الكيان القانوني وشروط الاستخدام

مين بيشغّل متجر

الطلبات: مين البائع، ومين بيقبض

• لمّا تطلب من متجر على المنصّة، البيع بيصير بينك وبين هيداك المتجر مباشرة. متجر بتوفّر الصفحة والأدوات؛ البضاعة والتسليم والاسترجاع مسؤوليّة المتجر.
• كل الطلبات كاش عند الاستلام. المنصّة ما بتقبض مصاري الزبون ولا بتمرق عليها، وما في دفع أونلاين ولا بطاقة بأي مكان بالموقع.
• الأسعار يلي بتشوفها بيحطّها التاجر. إذا وصلك شي غير يلي طلبتو، أو سعر غير يلي كان مكتوب، احكي مع المتجر أوّلاً — وإذا ما انحلّت، بلّغنا.

للتجّار: شو عم تاخد وشو عم تلتزم فيه

• فتح المتجر مجّاني، وبتقدر تضيف لحدّ ٣ منتجات على الخطة المجانية. الخطط المدفوعة سعرها منشور على صفحة الأسعار.
• ما منطلب منّك بطاقة ولا رقم حساب لتفتح متجر. الاشتراك المدفوع بينحسب بالاتفاق معنا ويداً بيد — ما في دفع أونلاين على المنصّة.
• ٠٪ عمولة على مبيعاتك. مصاري طلباتك بتوصلك إنت.
• كل متجر بينراجع قبل ما ينشر. إذا المتجر خالف القانون اللبناني أو ضحّك على زباينو، فينا نوقّفو أو نشيلو عن المنصّة.
• منتجاتك وأرقام زباينك ملكك إنت. ما منبيعها ولا منشاركها. لسّا ما في زرّ تصدير ذاتي — احكينا ومنبعتلك بياناتك أو منسكّرلك المتجر.
• إذا بدّك تترك، انقل ملكيّة المتجر لحدا أو احكينا نسكّرو. لا تحذف حسابك وإنت لسّا مالك متجر — بياخد معو المتجر وكل طلبات زباينك.

شو ممنوع يتنشر

• أي شي بيعو ممنوع بالقانون اللبناني.
• متجر أو منتج مش حقيقي، أو صور مسروقة من غيرك.
• معلومات أو أسعار مضلّلة.
• بلاغك عن أي شي من هودي بيوصلنا من زرّ «بلّغ عن مشكلة» يلي تحت كل صفحة متجر ومنتج.

إذا صار في مشكلة

• بلّغ عن الصفحة نفسها من زرّ «بلّغ عن مشكلة». البلاغ بينحفظ عنّا مع سببو، وفريق متجر بيراجعو — بس ما منقدر نوعدك بوقت محدّد.
• إذا الموضوع مستعجل، أو خسّرك مصاري، أو ما لقيت جواب: احكينا مباشرة عالواتساب. هيدا أسرع طريق لحدا بيرد.
• الاسترجاع والتبديل بينتّفق عليهن مع المتجر. إذا المشكلة ما انحلّت، منتدخّل ومنساعد الطرفين يوصلوا لحلّ عادل.

تعديل هالشروط

• إذا غيّرنا شي بهالصفحة، بتلاقي النص الجديد هون. ما منرجع بأثر رجعي على طلب صار قبل التغيير.

تواصل معنا